市場熱線：江銅不妨分段吸納

當然，實情係唔救唔得，否則遲早搞到歐洲錢莊要擠提，有得拖就要拖。所謂嘅救市措施係浪接浪，呢頭歐元區開完財長會議，下個禮拜三又有個歐盟大會，講來講去都係「貧病夫妻百事哀」。

魚缸翻生新股受惠

祖國出手時間亦配合得天衣無縫，而且唔係一招了，今次減RRR只係個開始，未來會減多幾次，甚至已有人講定減息，但手鬆同手緊主要睇通脹，呢兩、三個月炒通脹見頂，不過出年可能又見底回升。尋日多喜臨門（花旗經濟數據亦理想），冇乜人理尋日朝公布嘅祖國十一月PMI得49低過預期。

姑勿論係點，尋日全球魚缸報復性反彈，恒指升過千點、重上萬九、成交近千億、過千隻股票上升、大把升超過一成，空軍補倉補到甩褲，內銀、內房同水泥股大升慶賀阿爺卒之放水。十二月會唔會挾到你唔信？挾起上嚟冇乜理性，但如果以今年四月以來恒指都係一浪低於一浪，今次反彈由上次浪頂減800點計，大約會去到19,400點，頂多去到兩萬邊，實際水位已經唔多。

個市翻生最開心係今個月排隊招親嘅新股，新華人壽（01336）食頭啖湯今日公開招股，跟住輪到下個禮拜一嘅周大福（01929）同海通證券（06837），睇見一眾保險股同中信証券（06030）尋日表現，自然會吸引到唔少「游離票」。

電力股落實加價之後有獲利回吐，成為尋日逆市奇「差」。零售股雖然普遍上升但仍係偏弱，尋日收市後政府公布十月份零售數據，按年增長23%，扣除通脹後上升15%，明顯係一月低過一月，今年十月仲係特長黃金假期，所以賣衫股呢排唔精神係有道理。

供求失衡利好銅價

咁多樣商品最硬淨係油價，伊朗仲要被禁運石油出口，所以油價衝破100美金後可能回頭太難，而美金回軟亦有利商品價格，尋日除咗三大類別之外，商品金屬股亦好靚仔，盈利最差嘅鋼鐵股呢排回勇，主要話係鐵礦石跌價並降低成本；中鋁（02600）雖因加電價增成本，但股價仍升8%。

古勝不嬲係江銅（00358）嘅粉絲，尋日亦升12.6%收報19.3元，佢A股則升6%報26.36元人仔。國際銅價現時喺8,000美金樓下，同年初高峰時喺1萬美金樓上有一段差距，江銅上半年受惠於銅價上漲而盈利豐收，第三季經營利潤創新高，惟因對沖虧損而賺少3%，第四季唔使再為對沖撇帳，但內地銅價下跌，經常性盈利可能會按季減少。

根據國際銅研究小組嘅報告，出年銅求過於供嘅缺口會擴大到25.6萬噸，一定會對銅價帶來支持。而江銅今年嘅預測PE得7.5倍，雖然出年歐美經濟係未知之數，但江銅PE低點都有個譜，中長線就唔敢講，但呢個月搵股炒，江銅仍係資源股當中嘅首選。

古勝