絲絲講場：冼師傳同日雙喜臨門
國藝控股（08228）主席冼國林（冼師傅）最近雙喜臨門，皆因佢兩個Baby同時出世！第一個Baby，就係由冼師傅一手「湊大」嘅第一信用控股，向聯交所申請創業板上市已經獲批，預計將會喺下個月十三日掛牌；第二個Baby就係佢再度榮升做爸爸，第二任太太為佢生咗個囡囡，兩件事仲要都係同於十一月廿三日發生添，真係好事成雙囉！
囡囡出世6.8磅重
冼師傅個千金喺仁安醫院出世，即係千億新抱徐子淇生仔嗰間，冼師傅囡囡出世時重6.8磅，冼師傅話到依家仲未諗到改咩名，但希望個名表達出佢哋對囡囡愛惜同關懷。佢仲透露會搞百日宴，不過就會低調處理喇。絲絲好八卦想知囡囡似爸爸定媽咪多啲，佢就話尊重番私隱，唔會公開囡囡個樣啦。
第一信用獲批上市
至於佢嘅另一個Baby第一信用，喺香港從事貸款業務，新股編號係8215，計劃以配售方式上市，每股價錢約0.3至0.38元，2億股新股及1億舊股，每手10,000股，下個月十三日創業板掛牌。
冼師傅係創辦人、主席及執行董事，但佢話今次上市全靠成班同事嘅努力，所以依家都諗緊搞番個慶功派對，慰勞大家咁話。
余詩韻