絲絲講場：錢志健伸冤trader都有愛心
佔領華爾街行動由美國曼哈頓源起，轉眼間就搞咗個幾月。雖然美國政府最終出動胡椒噴霧清場，但有關行動已經擴散到包括香港在內嘅世界各地金融區，金融從業員更被視為噬血鯊魚、冷血動物，只要睇到有錢賺嘅機會，就會空群出動，懶理對經濟會造成乜嘢影響。
不過，絲絲覺得金融界都有唔少良心之士，好似尋日喺一個社企論壇上，就見到本身係對沖基金經理嘅錢志健（Edward）大談金融界嘅社會責任，呢位有多年操盤經驗嘅金融界專才，一開始都笑自己身上流嘅係trader（交易員）嘅血。最近身邊有trader朋友曾經同佢講，有時候覺得自己「心靈破產」。對此，Edward有感而發，對於一直被外界視為冷血動物嘅金融界，佢就話要為一班包括佢自己在內，都好有愛心嘅trader伸冤，因為金融界中都不乏有良心之士。
組電單車隊籌款
原來Edward做慈善一向好賣力，仲同一班banker朋友組織咗個Ride 4 hope嘅組織，耐唔耐同隊友揸電單車，為有需要嘅慈善團體籌款，仲會即場叫有興趣嘅朋友加入佢哋嘅Ride 4 hope添，佢亦認同佔領華爾街行動發生後，依家都係時候呼籲金融界做番啲嘢，諗吓點樣回饋社會，唔係一味只顧賺錢，Edward仲話，好似今年宣布退休嘅國際知名大炒家索羅斯，都要轉投慈善事業啦！聽完Edward一番說話，你話係咪好有heart呢！
余絲韻