日做夜做冇停手，成日出入媒體，又要開會，不過 Prof. J相信「人要靠打拚」，喺今時今日大家亦要奮發向上！大家都知彤叔眼光獨到，所以 Prof. J都密切留意緊由佢私人持有，最近又密鑼緊鼓上市嘅周大福珠寶。
周大福珠寶，係大中華區入面最大嘅珠寶零售商。四月時喺同行間已傳聞，周大福早已搵定幾間大行幫手包銷，其中仲有滙豐同高盛。集團大概想集資234億元以上，發行10.5億股，當中23.8%（2.5億股）係舊股。依家等緊港交所（00388）批，希望趕喺今年內上市，預期市盈率30倍左右。
周大福係多年老店，喺香港屬著名品牌；集團係全球最大嘅鑽石毛胚供應商，同時係英國鑽石貿易公司（DTC）全世界78個特約配售商之一。公司喺南非約翰內斯堡設有兩間鑽石切割打磨廠，內地同香港亦有鑽石切割打磨工廠同珠寶首飾設計製造工廠，員工超過30,000人，每年首飾產量逾700萬件。
集團市值大概800億至1,000億元，喺中、港、澳等地有1,100間分行左右。周大福呢次集資，當然志在四方啦！集團想將分行加倍至2,000間，胃口唔細！以彤叔3,000億資產王國而言，呢次上市都算係一個大動作！
香港大學電子金融服務榮譽助理教授徐燦傑