證券行出研究報告或morning note，好多時會畀啲「建議」。滙豐研究分析尋日出份投資morning note，加插向客戶強力推薦《孖展風雲》（Margin Call）套戲，認真鬼馬。
撰寫份報告嘅分析員，話啱啱至抽到時間去睇套戲，佢話套戲令佢感慨良多，所以推薦畀大家。佢仲話金融海嘯嘅場景恍如歷歷在目，若然今年係危機年，佢話危機根本係○八年嘅延續，環球經濟由嗰陣開始未曾復甦過。呢套華爾街片，係以雷曼垮台前為藍本，導演雖然係新丁，但佢老竇喺美林任職40年，所以行內人睇《Margin Call》，特別睇到尾場有一班金融大亨高盛、摩通傾點樣善後雷曼嘅身後事，肯定有會心微笑。
呢位分析員仲爆料話，有證券行打算請客去欣賞呢套外語片。《Margin Call》嘅精髓，係華爾街大鱷點樣將金錢世界變成地獄修羅場，情節對白入木三分，唔單只喺金融圈打工嘅人，會好有感覺，就連佢哋嘅客仔都會覺得某些情節似曾相識。