絲絲講場：致富天順吉日齊開分行

致富開夠第廿間

本身有十九間分行嘅致富證券，再喺人流超旺嘅灣仔區開設第二十間分行，致富證券董事總經理周松堦就話：「啱啱呢間舖嘅租約完咗，咁我咪收番做證券行囉！呢度面積千幾呎有多，等啲客戶可以坐得舒服嘛！」周老闆不嬲都鍾意研究風水術數，每次公司有新證券行開張，佢都會親自擇良辰吉日，兼提早到場打點一切。周老闆咁落力做生意，唔怪得之致富分行愈開愈多喇！

Rita姐駐上水天順

天順證券就喺上水區開第二間分店，開幕儀式同樣咁熱鬧，除咗有兩隻舞獅助興之餘，最重要係魚缸內有一位駐紮喺上水廿多年嘅分行經理鄧禮梅（Rita姐）坐鎮，唔怪得之該行嘅執行董事駱兆基都話對Rita姐好有信心，只要有佢坐鎮，相信會吸納到不少上水嘅街坊散戶。絲絲喺現場亦見到唔少散戶到場幫Rita姐打氣，可見Rita姐嘅強勁號召力。