中石化百勝搞合作
話說雄霸中國大陸加油站嘅中石化集團，同全球最大餐飲集團之一嘅百勝餐飲集團，簽咗合作框架協議，第日中石化嘅加油站會開設百勝旗下嘅餐廳，都係響噹噹嘅名號，係港人好熟悉嘅肯德基同必勝客。依家佢哋喺上海、山東、福建、廣東已經率先試推咁有創意嘅服務，仲訂下目標，要喺五年之內，有50間呢類餐廳。
話時話，香港都有中石化嘅加油站噃，唔知第日有冇機會喺香港揸揸吓車，踩入去中石化加油站歎吓薄餅同埋炸雞呢？不過向中石化了解過，佢哋話初初嗰50間餐廳都會喺內地，暫時未有香港份住。惟有寄望呢盤生意做得好，中石化佢哋見有利可圖，將呢項服務帶嚟香港，咁本地嘅揸車一族就有口福啦！