市場熱線：東氣增長概念吸引

德國賣債竟然有三分之一冇人吼，最主要原因係歐洲錢莊莫財，錢莊已經要畀高息吸存款，仲點會買唔夠兩厘息嘅債券？錢莊同歐豬國家要畀高息成本，結果都係死路一條。歐洲央行最慘，又要買歐豬債又要救錢莊，但亦有人估德國最終會同意印銀紙或發歐元共同債券兩條路，總之愈黑暗就愈接近黎明，所以外圍環境雖然仲惡劣過上個月，但股市未見好恐慌。

內房股久唔久炒轉

尋日有傳德國執政黨同反對黨對歐元債券立場軟化，雖然已經有人否認咗，但歐股市同美股期指顯著反彈，恒指低開200點之後亦跟住倒升，下晝一度倒跌，3點後再度做好，主要都係跟住美股期指同A股上落，外圍太多真假消息，做好做淡都死。

今日係花旗國「黑色星期五」，由今日開始係零售業食粥食飯嘅日子，本地零售股則好似打定輸數，六福（00590）7連跌，包浩斯（00483）同JOYCE（00647）尋日派成績表，前者賺少35%原來唔算太差，下晝開波曾勁升兩成，但收市得番7.4%；而JOYCE賺多80%，計落PE真係幾抵，但前景有陰影，炒完業績要識得撇。

定單增長仍然理想

尋日內房股報復性反彈，順便帶起埋水泥股，大摩發報告唱好，原因係期望阿爺出年會鬆手，而佢點題嘅兩隻股雅居樂（03383）同碧桂園（02007）更升幅超過1成。其實買內房股不如買內房債券，年息有十幾厘，除非閣下炒上炒落時機特別準，否則隨時輸多過贏。

尋日另一類股特別醒嘅係內地電力股，又係翻炒憧憬加電費，亦有大行報告煽風點火，但電力A股則多數要跌。古勝早兩日推介潤電（00836）時話有報道祖國將實施民用階梯電費，其實加電費受惠嘅仲有電力設備股，因為加電費後電企有錢賺，有錢賺自然有動機興建發電廠以滿足電荒缺口，推算之下電力設備股定單亦會有增長。

以火電設備為主嘅哈電（01133）會係最大受惠者，但出年核電有機會恢復審批新項目，所以東方電氣（01072）同上海電氣（02727）中長線更有投資價值。內銀、內房、鐵路同核電股都要睇住國策辦事，無非出於「憧憬」兩個字，但核電始終較為實在，因為對民生有百利而僅有一害，核電災害不應該不提防但亦不能過分誇張，本月初市傳國家核電標準將會出台，相信核電股會翻生嘅股友不妨候低吸納。

東氣跟住大市由最低16.26元炒上最高27.85元，回調跌幅一半之後尋日回升上22.4元，預測PE約12倍，頭三季盈利同定單增長仍令人滿意，假設出年核電定單恢復，加埋增長概念，東氣就會顯得吸引。

古勝