歐美債務危機有排都收唔到科，尋日又輪到祖國製造業告急，不過內地經濟現危機，中央放鬆銀根的機會亦會增加。近日就有消息指，祖國將會推出新一輪銀彈措施，規模並會由○八年的4萬億人仔大增至10萬億，但主要目標就唔再係基建，而係十二五規劃中提出的七大戰略新興產業，包括節能環保、新能源汽車等，若然屬實，相關板塊自然係大有錢途。
講到新能源股，中電新能源（00735）昨日股價異動，逆市升7.8%，收報0.345元。集團主要從事各類清潔能源發電業務，包括風電、水電及垃圾焚燒發電等，符合國家新能源國策的範疇。
雖然中期純利倒退27.2%，但無礙集團積極透過購併壯大業務，早前先後增持甘肅酒泉風力發電10%及雲南雙星綠色能源40%股權，加上母公司近期多番增持，均對股價有支持作用，昨日一舉突破10日線及50日線，成交配合增加，不排除有利好消息跟尾，升穿前高位0.37元，可上望0.4元水平，支持位睇0.32元。
詩詩