證監會前日臨放工前，其位處嘅遮打大廈突然走火警，證監會員工當然乖乖地聽從大廈管理處嘅指示，即時離開現場。大家梗係以為證監會員工難得喺臨放工前走火警，可以因此提早放工，真係諗到都開心，不過，實情係員工「盡忠職守」，走完火警後再返上去證監會，繼續工作搏殺，為香港廣大股民服務。絲絲都要畀個「讚」字佢哋！
話說前日晚上約六點左右，遮打大廈突然響起火警訊號，大廈管理處即時有廣播，通知各樓層員工要盡快離開現場。後來證實係小事一樁，大部分人喺大廈樓下逗留約15至20分鐘，不過員工沒有即刻「鬆人」，反而係走返上去繼續工作。
有證券界老闆就同絲絲講，近期大市波動，證監會巡查證券行好頻密，生意愈多就愈查得勁，證監會工作量幾大可想而知。