絲絲講場：美零售商明日憂「黑」
今日係美國人一年一度嘅感恩節，聽日就被稱為「黑色星期五」，美國人一般都會喺呢日出街shopping，但係今年歐債危機手尾咁長，大有可能影響大家嘅消費情緒喎！
感恩節嘅翌日，就係美國傳統嘅「黑色星期五」，所有零售商都對呢日非常期待，因為呢日嘅業績好厲害，可以佔全年嘅20%！傳統上佢哋用不同顏色嘅墨水來記帳，紅色表示虧損，黑色表示有盈利。呢日叫「黑色星期五」係零售商嘅心聲，希望喺呢日大賺，但員工就自嘲呢一日會做到死。既然咁重要，唔怪得好多舖頭都會喺呢日提早開門，玩具反斗城仲會喺早一晚嘅九點就開工搶生意！
歐債恐累「黑色星期五」
零售協會嘅調查就顯示，比起舊年嘅27%，今年會有33%嘅人聽日會去買嘢，國際購物中心都預計有25%嘅美國人會去shopping，業界希望今年「黑色星期五」嘅業績可以超越舊年嘅193億美元，衝擊200億美元大關。
但係消費者聯盟嘅調查就同呢班老細打對台喎，佢哋訪問咗1,011個消費者，有41%嘅人話今年使嘅錢會少過上年，話會使多過上年嘅就得8%，有好多人仲連感恩節當晚隻火雞都慳番，叫啲親友一人帶一樣嘢食嚟過節就算。「黑色星期五」係咪咁黑，過多兩日就知。