香港住宅物業交易有「額外印花稅」（簡稱SSD），台灣喺六月都開始實施奢侈稅，針對嘅對象包括房地產，絲絲尋日睇台灣媒體報道，自然美（00157）創辦人蔡燕玉（又叫蔡燕萍）早幾日，因為短期持有喺台北市嘅豪宅「勤美璞真」，而要交奢侈稅，估計都要成3,000萬（新台幣‧下同），即大約760萬港元！
根據當地地政資料，蔡燕玉持有嘅豪宅「勤美璞真」，發展商喺三月交樓，蔡燕玉就喺十月已經過戶畀其他人，由於持有未夠一年，所以根據規定，就要畀售價15%嘅奢侈稅，有地產人士估，若以一個單位兩億（約5,100萬港元）計，奢侈稅就要成3,000萬喇！
台灣同香港一樣，自從加多咗呢項新稅之後，二手市場靜咗好多，免得過都揸耐啲，免得交重稅。當地經紀話，勤美成交價約每坪（1坪約為3.3平方米）200萬，而勤美三年幾前預售嗰時，每坪約90萬到100萬左右，如果係當期時買嘅，扣除3,000萬嘅稅款，都應該仲有得賺嘅。絲絲就打電話去自然美問吓蔡主席點解賣樓，公司方面就話呢啲係蔡燕玉嘅私人野，所以都唔回應喎，佢究竟係咪有得賺，就真係無辦法知喇！