絲絲講場：渾水遇襲照噬分眾
近期經常發表報告，專門指美國上市嘅內地民企造假嘅渾水研究（Muddy Waters）又有新聞。不過今次唔係渾水攻擊人，而係畀人攻擊。渾水嘅網站尋日全線唔用得，首頁就有留言話「我們的網站遭黑客入侵」，話事人Carson Block就話，事件可能同佢哋最近發表分眾傳媒報告有關。
黑客入侵料非分眾所為
不過，渾水嘅網站仍然「死唔斷氣」，除咗話會盡快進行修復之外，仲特登加一句「仍然維持分眾傳媒強烈沽售評級。祝大家感恩節快樂。」西方媒體攞到渾水嘅正式回覆指，唔清楚被攻擊嘅原因。內地媒體就搵到Carson Block回應：「網站被入侵可能同分眾傳媒報告有關，但我唔相信係分眾做，估計係一班唔鍾意渾水嘅人做嘅。」
渾水喺本周一發表研究報告，指納斯達克上市嘅分眾業績有造假之嫌，當中涉及誇大LCD屏幕數目。分眾周一股價最多曾跌六成，其後周二反彈一成四。
余詩韻