市場熱線：熱切期待減存備率

有傳祖國四大國有錢莊今個月頭20日只係借出1,000億人仔，浙江有間農村錢莊率先降低存備率，所以孖屐亦傳祖國全面減RRR，為孖屐打番支強心針，但滙豐中國十一月PMI初值跌到48，標普期指亞洲時段跌10點過外，加埋美股隔晚低收，尋日恒指一開波已穿萬八，最多跌4舊幾，但10點半過後只係幾十點上落，收報17,864點，插387點，成交530億元，窩輪同牛熊證佔咗接近四成，沽空金額5日來第一次回落到10%樓下。

終極方案得三選一

花旗國今晚冇市，聽晚亦只係開半日，焦點集中晒喺歐洲。鬥牛國短債亦升到5厘樓上，歐豬債息逐級上，股市則逐級落，暫時睇唔到點收科。綜合孖屐意見，終極解決方案得三個：歐元解體、央行印銀紙同發行歐元債券，點樣都係睇德國臉色。

聯通（00762）大跌4.25%，雖話要接受反壟斷調查，但只係洗強勢股嘅藉口。反而弱勢嘅思捷（00330）突然回勇，原來係抄和黃（00013）條「橋」公布本身資產淨值，話自己個品牌值34億美金，即係較公司依家市值高1倍幾，根據公司轉載嘅市場統計，公司喺10大排名中排第5，排喺Nike、H&M、Zara同Ralph Lauren之後，但仲高過adidas同Uniqlo，信不信由你！不過，如果淨係計市值肯定唔入流，作為股民只係會睇成績表，之前見公司總裁增持，之後搞咗個「投資者日」，但冇發通告亦冇網上直播，有興趣嘅可以上公司網頁睇番上述資料。

撈斬倉股要識快閃

品牌價值呢樣嘢好難計，以前李寧（02331）同中動向（03818）市值亦超過300億，但品牌一老化就有排煩，因為時裝同科技均係一個競爭好激烈嘅世界，所以呢兩類股都係大上大落。除咗品牌價值之外，埋喺地下嘅價值亦係任佢噏，中國煤層氣（00578）「前」老細亦曾對記者講話公司煤層氣蘊藏量值300億銀，前日暴跌原來係大股東被斬倉，尋日大反彈，傳聞貨源落入強者手，情況類似前排嘅國中（00202），但睇國中跟住嘅走勢，食飽就要識閃。

前日亦暴跌嘅志高控股（00449），尋日一度再插兩成，但收市只係微跌，咁啱有消息話阿爺再啟動節能電器補貼，仲會擴展至全部電器，都唔知真定假。但買股仔最擔心嘅係大股東抵押公司股票做孖展，一插水就走唔切，有公布股份抵押仲可以避之則吉，但大部分都係冇人知。

珠寶股冇影子效應

廣州有幾間大金舖被工商局發現質量唔合格，包括周六福、謝瑞麟（00417）同金至尊等，周六福其實同六福（00590）及就快上市嘅周大福均冇關係，但六福已經6連跌，毫無影子股效應。新股中國車輛零部件（01269）首日上市股價好風光，但睇成交就知乜事，好多半新股已變成殭屍股，專業旅運（01235）尋日逆市升7.3%，但成交金額得16萬銀。

古勝