上周末人民幣邁向國際化又踏出重要一步！呢個消息唔係嚟自人行，而係蘋果公司。佢哋宣布iPhone嘅軟件下載服務AppStore，正式接受人民幣付款。
內地嘅「果粉」以至軟件開發者，當然叫好叫座。不過就好似其他進入內地嘅互聯網及移動增值服務一樣，蘋果公司今次嘅行動，可能已觸動內地規管部門嘅神經，AppStore能否借此成功走向本土化，亦有待觀察。
AppStore收人仔有幾好？首先下載服務嘅內地用家，省卻要以美元碌卡過數所產生嘅匯兌麻煩，而內地手機開發者亦有機會直接以人民幣分帳，而蘋果公司接受人民幣付款，亦為人民幣走向國際帶嚟重大意義。不過內地有報道指出，蘋果今次夥拍嘅內地網上支付公司，據講仍未獲人行發出第三方支付牌照，蘋果公司點處理人民幣結匯令人關注。
另一風險就係AppStore嘅業務模式，喺內地可以被視為電訊增值服務，蘋果公司可唔可以以獨資方式，喺內地推展AppStore業務，似乎存在灰色地帶，蘋果公司點樣同監管部門溝通，勢將影響AppStore拓展內地市場嘅大計。