兔仔係可愛嘅動物，但今年嘅投資環境真係一啲都唔可愛，「兔年」畀歐債及美國經濟搞到亂七八糟，出年係「龍年」，股市會唔會生猛番晒？真係要算過至知。尋日「細摩」摩通就專登出咗份「龍年」揀股報告，實行做大家嘅「黃大仙」，佢揀咗長實（00001）、和黃（00013）、金沙中國（01928）、友邦（01299）及I.T（00999）為「龍年」五大首選股份，但就叫大家要避開中華煤氣（00003）、鷹君（00041）及恒生銀行（00011）。
「細摩」話，依家嘅地產股股價已經反映咗「超弱」嘅市場，但近期樓價只係溫和調整，明顯較市場預期為佳，且長實今年新盤「大賣」，又受惠低土地成本，而和黃每股資產淨值嘅折讓已經接近低位，加上3G業務已穩固地錄得收益，所以睇好長、和股份，目標價分別睇114元及94元。
賭場同消費股繼續受惠旅客及零售銷售嘅增長，而友邦新業務價值喺未來數年，可望維持係約20%增長。
不過，「細摩」就睇淡銀行股，受到美國聯儲局「扭曲操作」，以及存款競爭，令淨息差受損等影響，銀行業來年嘅經營將會比○九年更困難。
呢幾年睇股票真係唔可以忽略各國政策。「細摩」提醒投資者，喺「龍年」港股復甦要視乎四大因素，包括中國維持穩定經濟增長、金融服務收入復甦、內地來港澳嘅簽證制度維持不變，以及本港銀行跨境貸款壞帳率維持溫和。畀咗咁多貼士，大家有心水未？