瑞銀「魔童」Kweku Adoboli最終令公司損失幾多，依家仲未「判」，但幾可肯定嘅係，今年花紅一定會買少見少。
靚女賓卡早前同絲絲講，今年生意真係好差，整體花紅應該係咁多年嚟最少。瑞銀仲畀隻「魔童」搞單違規交易，公司已經上調損失金額，由原本估計嘅20億美元，上調至23億美元，花紅池（bonus pool）規模惟有向下調囉。
呢個估計並唔係絲絲講嘅，而係嚟自瑞銀臨時行政總裁埃爾莫蒂（Sergio Ermotti）。不過，呢個說法同佢哋喺上個月公布第三季度業績時，有啲唔同，當時佢哋話，唔會因呢單醜聞而影響到花紅池，換句話說，該行第三季度總計13.5億瑞郎嘅收入中，90%將用於發放工資和花紅，員工當時以為食咗定心丸啦，點知呢個說法惹來廣泛批評。如果埃爾莫蒂係講緊事實，瑞銀睇嚟唔敢再得罪班股東，惟有由員工嚟承擔惡果。