絲絲講場：葛霖管埋英國金融業
金融海嘯之後，全世界嘅監管機構都金睛火眼咁睇實金融服務嘅規管，之不過人才就唔可以突然間多咗，惟有睇多幾瓣啦。曾任滙控（00005）主席嘅英國貿易及投資大臣葛霖，累積咗咁多年經驗，在任滙控期間，都冇爆過大鑊，唔怪之得英國財政大臣歐思邦睇重佢，搵埋葛霖處理金融服務同銀行問題，葛霖又有得再展所長啦。
曾批評業界貪婪
葛霖做咗咁多年英國賓卡，當年做滙控話事人時，言論已經舉足輕重，仲喺金融海嘯後，對花紅制度同銀行業嘅貪婪有唔少批評，表現已經同做官嘅口脗差唔多，結果真係走去做貿易及投資大臣，依家既然管埋銀行問題，以英國對銀行業愈管愈緊個勢，睇嚟英國賓卡要打醒十二分精神啦。
絲絲記得，葛霖早喺幾年前，就出咗本書，叫《Good Value》，用宗教角度去反思金融業。睇嚟佢早就有一套自己對成個行業嘅睇法，依家有得幫財相，可以將自己嘅見解用番出嚟，不過似乎就無紮職，但係相信身為牧師嘅葛霖，都係重視使命感同發揮空間多啲嘅。