絲絲講場：鄭威濤：無諗過掟米蘭站
經營二手名牌袋嘅米蘭站（01150）唔經唔覺上咗市就快半年，大家都關心幾位基礎投資者會唔會趁聽日禁售期完結，沽咗手持嘅股份。作為米蘭站最大基礎投資者嘅和之味飲食集團（經營板長及板前壽司）董事總經理鄭威濤，尋日就同絲絲講，無諗過呢個問題，仲話絲絲「唔提我都唔記得呢件事添」。
查實米蘭站嘅大股東姚君達，同鄭威濤可以話「老友鬼鬼」，年幾前兩兄弟夾份投資灣仔商舖，最近放售，賣得出嘅話，可以賺超過1.8億元。記得米蘭站搞上市嗰陣，鄭威濤出錢出力──做最重磅嘅基礎投資者，又親為佢哋站台做宣傳。雖然依家股市危危乎，無損佢哋嘅股東關係。
禁售期滿 取向惹關注
米蘭站上市時十分威水，唔單止成為「超購王」，掛牌當日仲逆市大升65.86%。半年眨吓眼就過咗，米蘭站尋日嘅收市價就有啲失威，收市報1.43元，低過招股價1.67元。鄭生話唔會沽貨。查實係咪股價表現麻麻至唔沽住？鄭生話唔關股價事，話買股票係作為投資，仲話個人對呢個行業有信心。
翻查番米蘭站上市時嘅資料，鄭生當時斥資3,000萬元購入1,800萬股米蘭站，如果以尋日收市價去計算，帳面上已經唔見咗426萬元。除咗鄭威濤之外，米蘭站當時仲引入建銀國際資產管理、理文造紙首席執行官李文俊同埋太子珠寶鐘錶公司主席鄧鉅明，四個基礎者合共持有米蘭站3,472.6萬股。
余詩韻