市場熱線：中石化防守力強

5連跌加埋唔夠1,300點，以意西法美輪流出現危機來講，古勝覺得直情跌得少，但咁樣陰乾法會消磨股民嘅意志，尋日成交得513億元，唔使幾耐就會見4字頭，窩輪同牛熊證佔大市成交稍低於四成，而期指成交得7萬零張，但尾市大低水115點，沽空金額亦連續兩日超過一成，但強勢嘅聯通（00762）竟然成交六成係沽空，中資電訊股如果冧埋就大鑊。

萬八關岌岌可危

歐洲衰養尊處優太耐，而美國則長期被政治爭拗拖累，今次最壞後果係「木獨」同「毀譽」都忍唔住要將老美降級，有幾嚴重可以各自發揮想像力。歐洲亦係冇乜轉機，鬥牛國大選在野黨大勝又如何？歐元債券被喻為最後解決方案，但最大問題係德國自己唔想被拖落水，灣仔同深水埗都唔同級啦，何況17個歐元國家？

恒指雖然暫時頂得住萬八，但未來兩日呢個關口危危乎，內銀同內房股係難兄難弟，而內銀股更係被大行唱衰，但兩類股過埋年尾交數高峰期會有一定鬆動。水泥股不嬲係大市嘅「放大器」，所以亦係表現較差。包浩斯（00483）發盈警大跌24.8%，但同景福（00280）及盈進（01386）一樣，古勝相信係公司營運問題而非零售整體市道放緩，買零售股嘅好處係逛吓街就略知一二，但古勝對零售股嘅盈利增長亦有啲疑問。

大隻佬成分股有7隻上升，包括兩隻公用股同兩隻中資電訊股，聯通就話3G上客創新高啫，但被搶客嘅祖國移動（00941）亦轉跌為升，原因係電訊股已被列為防守性股份類別。

QQ（00700）突然轉強唔知乜原因；古勝話華創（00291）跌穿25蚊可以一諗，相信唔少人抱類似諗法，隻股創52周新低後倒升；至於中石化（00386）則憧憬呢個禮拜會加成品油價，總之「7升股」都屬於抗跌力較強股份，反映股友依家都係打守勢波。

憧憬成品油加價

買着中石化，跌市都唔使驚，上個禮拜更升到8.48元貼近52周高位，皆因好消息唔少，包括成品油定價機制改革、油公司上書要求降低暴利稅同埋成品油加價，前兩樣只係煲住冇米粥，大大話話講咗兩、三年，但成品油加價原因只係跟住國際油價調整，差別只係加快減慢抑或減快加慢。

前排通脹破6嘅時候，成品油的確係減快加慢，搞到中石化同中石油（00857）牙痛咁聲，電廠虧損會鬧電荒，煉油廠虧損會鬧油荒，所以限價只係權宜之計，問題係阿爺搞嘅「成品油定價機制」同「煤電聯動」都屬有名無實。依家通脹回落，好應該對煉油廠補數，中石化短線可望繼續跑贏大市，但等7.8元附近至買未遲。

古勝