大市跌多反彈少，金魚缸中人好多都無啖好食，個個心情都唔多靚。絲絲聽聞，主要由金融界前線員工組成嘅證券及期貨專業總會，今個月二十九日嘅「10周年」會慶，規模將會大縮水，由前年大排筳席四、五十圍，到今年只擺廿零圍，反映金融業界嚴冬日子已經降臨。加上近排陸續有金融機構派「大信封」，睇嚟今個冬天真係有排捱！
證券及期貨專業總會會長王國安向絲絲直認，近排個市咁差，各人心情都麻麻地，所以今年會慶不會再大規模咁搞，而係會低調進行，大家圍埋「食餐飯」算喇。記得前年該會會慶，喺上環一家酒樓大排筳席，又請咗不少嘉賓，絲絲只好講一句，真係今時唔同往日。
王國安仲同絲絲呻，經紀依家真係好慘，覺得個市仲衰過「沙士」，生意好少，加上又有行家「擘佣」、沽空肆虐，經營環境簡直係雪上加霜。
港交所尋日就公布十月經紀市佔率，代表小經紀嘅C組經紀，市佔率雖由九月嘅9.54%回升至10.16%。但試問，有幾百間細行，港股每日成交額又只有七百億左右，「僧多粥少」，點夠分呀？
余絲韻