要數近期最「紅」內房，相信話係綠城中國（03900）都無咩人反對，佢因為資金問題而廣受大家關注。
最近又傳要破產又傳要賣資產咁，但都畀老闆宋衛平一一否認，而且宋總嘅朋友認真唔少，繼之前阿里巴巴（01688）嘅馬雲搵自己友團購綠城樓盤之後，融創集團老細兼CEO孫宏斌亦都力撐綠城，實行出手又出口相助！
絲絲之前同孫宏斌傾開偈，都知道佢好欣賞綠城呢間公司，覺得佢哋係中國最有品質嘅發展商之一，而對產品亦好執着。孫宏斌早排仲喺微博上話，自己最近喺無錫買咗間綠城起嘅樓，一來係價格合適，二來亦都係表示對綠城嘅支持。
可能孫宏斌幾年前創辦嘅地產公司順馳，因財困而被迫賣盤，所以今次雪中送炭支持同行。孫宏斌仲話，綠城同當年嘅順馳完全唔同，佢有900幾億元嘅存貨，只要減價銷售就不會有問題，相信綠城唔會成為第二個順馳！
余詩韻