美國經濟復甦慢過蝸牛，甚至有機會「迷失十年」，但原來無損佢哋超級富豪身家，包括美國在內嘅北美地區，喺未來二十年，都會繼續領先包括近年冒出好多富豪嘅中國在內嘅亞太區，成為富豪數目最多嘅一哥。
呢個調查係由一家以新加坡為基地嘅研究機構Wealth-X所做，即二○三二年前，北美地區嘅超級富豪，會有62,960人，比歐洲嘅54,325人多大約25.9%，比亞太區嘅42,525人，又多咗成48%。邊啲人屬於超級富豪？淨資產至少要有3,000萬美元（約2.34億港元）。
北美地區富豪人數遠超亞太區，要多謝企業家精神，而亞太區嘅百萬富翁仍然需要一段時間去累積財富，至躋身到超級富豪行列。不過，報告話，當呢種轉變真係發生，即亞太區富豪反過嚟多過北美地區嘅話，呢種情況就會恒久維持不變。但依家就係美國威啦，報告話單係加州、紐約同埋德州加埋嘅財富，已經多過中國同印度嘅總和，亦都為美國嘅財富管理公司提供大量職位，為呢班超級富豪管理佢哋嘅億萬身家。
余詩韻