負責選特首嘅選舉委員會界別分組選舉，已經開始接受報名提名。今屆金融服務界嘅議席，增加去到18席，自然引來業界人士「虎視眈眈」 ，為議席「爭崩頭」。過去一直積極參與選委會選舉嘅「股壇大姐」蔡陳葆心，今屆卻「反高潮」，拒絕再玩！
蔡太同絲絲講，自己已「玩夠」，加上年紀大，應該畀啲機會「後生」。因此，雖然蔡太拒絕再玩，但佢個仔證券商協會主席蔡思聰相信會報名。
絲絲問蔡太，佢會唔會協助拉票，佢就答「順其自然」喇。佢話選民係好精明嘅，除咗知名度外，最緊要都係做到嘢，就好似今屆區議會選舉咁，選民係有智慧嘅，絕不會因一時甜頭而投票。
選委會選舉已經開始報名，金融服務界已有4人報咗名，包括中銀國際嘅謝湧海、國泰君安嘅閻峰、東泰集團主席兼港交所（00388）董事李君豪同陳立德。絲絲聽聞，金利豐集團老闆娘朱李月華，恒豐證券張華峰尋日亦已經報咗名。而證券及期貨專業總會會長王國安、六福金融許照中等等亦正考慮報名。
余詩韻