市場熱線：暫宜觀望以靜制動

不過，歐股開市後，期指尾市轉高水70點，跟住歐股同道指期貨更由跌轉升，恒指黑期反彈超過300點。大家都知道意大利一出事就好大鑊，尋日意大利5年期國債息一度升到7.8厘，但下晝5點鐘意大利拍賣50億歐元國債又反應幾好，傳聞歐洲央行亦有出手買貨，意大利同時加快通過緊縮方案。總之，個市好似捉棋一樣，視乎對手行邊步棋而進行還擊。

歐元區遲早解體

雖然依家歐美已行緊冬令時間，3點鐘唔使再睇歐洲魚缸臉色，但當意大利債息一升，港股就嚇到腳軟。短線個市有反彈機會，但中長線都係不容樂觀，因為歐洲潛藏個黑洞真係好大，淨係萬九億歐元負債嘅意大利已經難救。

古勝都講過EFSF槓桿化到1萬億歐元其實唔湯唔水，炒家唔再空襲至奇，果然趁住意大利總理落台，意大利10年國債即刻炒高到7厘樓上。其實前日港股未開市意債息已逼近7厘，但港股照升幾百點未驚過，不過一升穿7厘「警戒線」就變成世界末日，股市就係咁荒謬。

意大利個「花花公子」總理落台，希臘又變天，麻煩在政客為爭取選票就會亂開空頭支票，到時削債又得個吉，要班享受慣高福利嘅歐洲佬勒緊褲頭簡直係癡心妄想。外電話法國同德國密謀另起爐灶，搞個縮小歐元區，類似歐洲「超級聯賽」咁淨得巴塞、皇馬、曼聯、拜仁呢類強隊玩，好多人一早批死歐元區會解體，睇怕係遲早嘅事。

尋日祖國亦公布咗外貿數據，十月出口增長得15.9%，多數人話失望，但咁嘅環境其實已經唔算差，依家歐洲係國窮人富，所以真正出口寒冬要等出年。

今日係「光棍節」，仲碰啱係11年11月11日，所以特別應「棍」，無可否認全世界剩男剩女愈來愈多，出生率低加埋人口老化，就算冇次按風暴同埋歐債危機，全球經濟亦有機會走下坡。用以往股市表現來預測回報肯定錯得交關，要買某某基金寧願買領匯（00823）好過。

港股尋日受三面夾擊，外圍之外，大笨象（00005）同工行（01398）都慘跌，工行更跌穿批股價下限，搞到高佬批貨甩唔晒。大隻佬跌幅榜第3位係有「威士」上場嘅新發（00017），不排除有心人想收集「威士」參與供股，第4位則係今日如無意外會被踢出大隻佬行列嘅思捷（00330）。

晨訊強勢有原因

尋日下跌股數超過1,100隻，南車（01766）獲鐵道部還錢100億人仔都要跌。逆市奇葩包括冠捷（00903）同長城科技（00074），前者宣布收購飛利浦電視機業務，其實唔算係好消息，因為買嘅係蝕本貨。晨訊（02000）屬於呢排強勢股，當然唔會升得無緣無故，尋日公布十月份收入按月升73%。

雨潤（01068）畀瑞銀踩，將佢目標價削到10.6元，隻股尋日跌7%，收報11.94元。其實經過之前被大鱷同內地傳媒聯手狙擊之後，間公司已低調咗好多，為免再被人話劏豬為呃國家補貼，所以雨潤未來亦會放慢發展劏豬業務。

古勝