大家成日行街，對唔同公司嘅生意狀況，理論上都好熟悉，係咪？講起時裝，除咗電話成日換新裝之外，要出街見人，少不免成日買番幾件「戰衣」，係咪？呢類型公司，食正潮流同風潮，就飛得上天，仲可以令有眼光嘅股東都大賺一筆，都咪話唔和味。
I.T（00999），想當然大家都有聽過，冇聽過都有見過，皆因佢周街都係地舖！呢間嘢近幾年品牌做得唔錯，每年盈利都有唔錯增長。集團一直採用「多品牌、多層次」嘅營銷策略，用唔同嘅品牌組合，以及時尚設計師嘅魔力，打造一個潮流形象。
今時今日，大家買件衫番嚟，當然就係買佢嘅設計啦，係咪？同一時間，集團除咗不斷開發不同服裝品牌之外，亦積極打通中國市場嘅渠道。其實呢個係支強心針，只要佢嘅品牌夠響，要傾銷畀祖國同胞，絕對冇難度！
睇番數據，集團一○年度中國市場總收入上升32.9%，毛利增長33.5%，中國市場嘅收益毛利一齊起飛！
集團近幾年都維持高速增長，○七年至一一年盈利平均增長三成多，絕對夠支撐依家嘅17倍多市盈率！繼續追蹤，出發！
香港大學電子金融服務榮譽助理教授徐燦傑