絲絲講場：滙控撬人瞄準英央行
加人工一向係打工仔心目中嘅頭等大事，公司一旦處理唔好，隨時令人才流失，英倫銀行就係活生生嘅例子。話說彭博引述消息話，滙控（00005）啱啱撬走咗英倫銀行專睇當地經濟數據嘅經濟師Simon Wells，今次已經係近期第三單經濟師被挖角。
金默文以怪招抗衡
面對挖角潮，英倫銀行行長金默文就以怪招應對，就係下令佢哋嘅餐廳停止加價，以激勵士氣。雖然絲絲對金默文呢招不敢寄予厚望，不過都同情佢嘅難處，因為喺當地政府嘅兩年凍薪計劃下，好難避免員工畀人挖角，正如前央行經濟師Richard Barwell話，呢個已經係老問題，英倫銀行最好嘅人才難以抵擋私營機構嘅金錢攻勢。
其實滙控都幾鍾意邀英倫銀行嘅經濟師過檔，特別係研究英國嘅人才，除咗Simon Wells外，前排就有John Butler，再遠啲就有○六年嘅Karen Ward，唔知係咪貪佢哋系出同門，特別容易溝通呢？