絲絲講場：國航孔棟退休王昌順上場
內地嘅金融監管機構第一把手，啱啱至大執位，跟住落嚟應該輪到航空業。絲絲收到風，民航總局副局長王昌順已經正式出任中航集團嘅總經理，相信係接任即將退休嘅現任集團總經理兼國航（00753）董事長孔棟，為新一輪大執位揭開咗序幕。除咗中航之外，三大內航老臣子嚟緊陸續都會退下火線。
王昌順做事較隨和
絲絲聽講，相對於孔棟嘅沉穩果斷，行事務實內斂嘅作風，王昌順就係少壯派，為人做事比較隨和，同埋佢做咗民航局第一副局長咁耐，一直管理住日常工作，對民航政策同行業發展有較準確嘅把握，相信會帶領國航進入新階段。現年54歲嘅王昌順於二○○○年出任南航（01055）總經理，四年之後就轉咗做民航局副局長至今。
講番現年60歲嘅孔棟，佢○二年出任中航集團副總經理，○八年做埋國航董事長，咁多年來中航集團同埋國航嘅業績大幅提升，版圖亦不斷擴張，都稱得上係功臣。
李軍辭任東航職務
另亦有傳東航（00670）總經理馬須倫會轉到母公司做黨組書記，而原先嘅李軍就有機會轉去做民航局副局長。隔咗幾粒鐘，東航就公布李軍不再擔任副董事長職務，但冇話佢去邊度落腳。行內人士仲話，國航同東航嘅人事變動只係開始，嚟緊三大內航高管將會有更大變化。面對內地高鐵咁強嘅對手，絲絲都好期望新一代高層會新人事新作為，帶領內航業再次「一飛沖天」！
余絲韻