市場熱線：財險可小試牛刀

「高佬盛」唱淡本地錢莊股，地主股又因為有新盤減價促銷而受壓，本地力量十分薄弱。諗住紅色分子繼續撐住半邊天，點知A股高位遇壓，滬綜指僅升3.9點收場，結果藍籌股除咗華潤置地（01109）同國壽（02628）之外，全軍盡墨，內銀普遍回吐，即使太保（02601）同國壽分別升4.2%及3.9%，但國企指數仍跌150點，收報10,294點。

本地魚缸Chok不停

正常人被呃一次就會學精，第二次唔會再上當。QE之初一度為孖屐帶來希望，但結果要出QE2，孖屐冇得選擇，再次落疊，結果呢？聯儲局啱啱將花旗國一二年GDP預測下調至介乎2.5至2.9%，並預期失業率會介乎8.5至8.7%，較原先估計嘅7.8%至8.2%為高，一幅經濟將持續轉差嘅畫面就在家下眼前。古勝依然相信，阿伯深明即使再推QE3唔會有人相信，惟有繼續一味靠拖，等奇迹出現！

依家希臘搞公投尚存變數，皆因即使公投之舉合乎憲法，都仲要獲得議會通過先可以進行，更何況現屆政府本周五仲要過信任票呢關，一旦失敗，隨時要提前舉行大選。如今歐債危機猶如一個毒瘤，時不時發作，唯一能與之抗衡嘅係祖國「微調」，港股正要在兩者之間取得一個平衡點，恒指繼續喺萬九至兩萬點水平Chok上Chok落，好淡未分勝負，落場前要食定驚風散！

尋日古勝話，一拖（00038）股價要試7.8至8元阻力位先會回頭，果然如是，尋日衝到上7.93元掉頭，收報7.72元，升2.9%。此外，前日經已發現LED股有異動，叫大家(目及)實嘅真明麗（01868），真係後來居上，尋日一度抽上1.51元，收報1.43元，升10%。

10元關承接不俗

年底前尚有IPO爭取喺年底前趕搭尾班車，屈指一算，單計周大福同海通證券集資額合共超過400億元，數目都唔細，但若然呢次闖關唔成功，拖到明年變數更多。既然係許勝不許敗，亦不妨提早留意相關影子股，如六福（00590）及中信証券（06030）。

講番保險股，尋日國壽大發神威，但查實其壽險業務表現差強人意，買盤仲咁積極掃入，唔排除係政策因素使然。若然要投注保險股，中國財險（02328）嘅勝算也許較高，事關基本因素較佳，而上周股價急升13%過後，本周整固10元關承接力唔錯，尋日收報10.86元，技術上若能以大成交突破12元關，可確認扭轉七月以來嘅跌勢，10元邊可以小試牛刀。

古勝