被巴西籍明星前女友狠批「孤寒」嘅國際金融大鱷索羅斯終於作出反擊。
據《紐約郵報》引述索羅斯代表律師向法院遞交嘅文件，索羅斯形容佢同28歲前女友費雷嘅關係，可以用得上係「時有時無，並唔係唯一嘅親密關係」，又話女主角只係想藉呢一段關係，榨取更多嘅金錢利益，所以佢認為法院應該駁回費雷嘅入稟狀咁話。
呢段「索老與索女」嘅霧水情緣演變成男女主角對簿公堂嘅局面，相信連見慣大場面嘅索羅斯也始料不及，兩人喺○六年邂逅，約會五年後最終喺舊年分手。
費雷喺今年八月，入稟曼哈頓最高法院，指摘索羅斯曾經應承贈送價值190萬美元嘅大宅畀佢，之後又反口，費雷仲大爆曾經被索羅斯動粗添，於是入稟索償5,000萬美元（約3.9億港元）。
索羅斯透過代表律師話，費雷指佢曾經承諾贈送公寓，簡直係荒謬，仲話有人試圖扭曲佢嘅財富分配。面對索羅斯嘅反駁，女主角費雷呢邊一啲都唔手軟，透過代表律師話，呢啲係沙文主義同簡單化嘅回應，對於索羅斯嘅所作所為，自己已經死晒心，而且話唔相信佢可以成功駁回呢宗入稟添。
余詩韻