絲絲成日聽啲散戶「呻」依家個市好難玩，睇少陣都唔掂。但係就有研究指出，成日「𥄫」住股票上落嘅散戶，隨時係「爆血管」高危一族；專家仲話，其實散戶唔睇得咁密，隨時健康好啲，頭腦又靈活啲，炒股票都贏多啲啦。
根據由Bernstein Research做嘅研究，喺○六至○八年期間，內地股市的每次震盪，都會令內地股民嘅心臟病「發病率」提高，仲話每1%嘅股市跌盪，可令內地股民心臟病發並死亡的機會率，平均增加1.9%。
美國亦有相似嘅發現，話當股市下跌，「爆血管」個案就會增多；當股市順番，個案又即刻少咗。
專家話，內地個案特別多，可能同內地股市參與者，多數為年老退休人士，以及佢哋用自己嘅退休金「入市」有關；由於佢哋一般都可以成日坐喺交易大堂度睇成交，所以股價每一下嘅跳動，都會牽動住呢班「炒家」嘅心；反而，如果佢哋唔好睇咁密，挫敗感就會少啲，對健康及理智決定投資方向都可能有幫助。
余詩韻