絲絲講場：四叔辭33職 80%細仔接棒
四叔李兆基唔做恒地（00012）旗下一堆公司仔嘅董事，被講到部署退休咁，恒地大公關Bonnie同絲絲呻，尋日係咁接傳媒電話查問，重複解釋澄清件事，講到連口水都乾埋，佢話四叔精神身體都不知幾好，點會無端端退休呢？
留任主要公司董事
Bonnie話，恒地發展到咁大規模，旗下附屬公司大大小小過千間，如果四叔間間都坐住董事個位，簽名都簽到手軟呀，而且今時今日恒地成個集團都上晒軌道，所有附屬都可以自行營運，所以淨係架構最頂層嘅上市公司、控股公司同四叔私人投資旗艦兆基財經等，四叔先至繼續做董事。而恒地嘅生意夥伴同銀行都好理智，無打過電話嚟問。
大仔家傑主攻內地
四叔同集團副主席林高演，過去兩個幾月辭任三十幾間香港附屬公司董事職位，呢啲都係規模細、上咗軌道或者已經停止運作，四叔不時要按業務需要，出任新成立附屬公司或退出原有附屬公司董事，係正常嘅商業行為。
至於部分在港附屬公司董事，由四叔細仔李家誠上陣，Bonnie話，四叔一早有講，家誠管香港、大仔家傑主攻內地，分工好清楚。
四叔辭任嘅33間附屬，當中27間由家誠任董事，另外6間就由四叔胞妹馮李煥琼，同恒地高層李鏡禹擔任。
余詩韻