手機遊戲「憤怒鳥」（Angry Birds）風靡全球，依家仲搞埋上市添。中國嘅機迷都好受落，自然就會出好多盜版玩具，難得嘅係呢款高人氣手機遊戲嘅出品公司Rovio Mobile嘅首席執行長維斯特巴卡（Peter Vesterbacka），對呢啲冒牌貨一啲都唔憤怒，仲講笑話要「盜用盜版」。
依家周街都有憤怒鳥盜版玩具，同埋非授權商品。Peter身穿大紅色「憤怒鳥」運動衫，手拿「憤怒鳥」氣球，出席北京嘅論壇，佢話中國係佢哋最大兼增長最快嘅市場，中國市場上呢啲未經授權嘅商品，令佢印象深刻。佢甚至開玩笑話，自己可能不得不用呢啲商品作為靈感，進入一個「盜用盜版」嘅領域。
原來「憤怒鳥」喺中國嘅下載量已達到5,000萬次，佢希望能達到一億次。雖然呢個遊戲大受歡迎，但Peter透露，成立於○三年嘅Rovio，目前正致力於成為一個娛樂品牌，而唔係一個遊戲公司。
Rovio目前打算繼續發布為中國市場定製嘅產品，早前佢哋製作咗以中秋為題嘅連環漫畫，同專門為中國市場推出咗品牌月餅。今年十月Rovio喺上海設立咗中國首個辦事處。依家正進行大規模招聘，佢哋希望比中國公司更具中國特色。