絲絲講場：證監會「尋人」搵你幫幫手
警方出尋人或者通緝啟示絲絲就睇得多，估唔到證監會都用埋呢招，實行用人肉搜尋方法，邀請公眾提供線索，等證監會有多啲資料調查。
網站新欄 針對兩類人
證監會尋日喺佢哋嘅網站推出新欄目，邀請公眾協助證監會尋找行蹤不明嘅人士，目的係協助進行調查。新欄目叫「你認識這些人士嗎？」為標題，佢哋主要想搵兩類人士嘅資料，其一係遭法院下令逮捕嘅人士，其二係掌握咗某啲重要資料，相信能協助證監會進行調查的人士。
呢項工作由證監會法規執行部執行董事施衞民（Mark Steward）負責，佢同絲絲講，呢個步驟對證監會嘅調查工作好重要，因為有啲人係唔可以循一般途徑取得聯絡。有咗公眾嘅支持，深信證監會能夠更有效咁執行香港嘅證券法例，為社會帶來裨益。
施衞民仲向公眾派定心丸，所有提供嘅資料將保密處理，並會定期更新。一旦確定有關人士嘅行蹤，其資料將會從網站刪除。
3人上榜 疑身處內地
首批「上榜」人士有三人，兩男一女。三人分別是：唐彥田，中盈控股（現為中盈國金資源控股）執行董事；潘彩虹，世大控股主席嘅顧問；梅曉東，持有證監會第4及第9類受規管活動牌照。三人嘅共通點係證監會相信三人均身處內地。人海茫茫，真係要大家幫吓手至得，如果有獎金就更加好喇！
余絲韻