市場熱線：入市毋須急於一時

尋日恒指早市係威係勢，平開抽高，見20,155點全日高位，之後幾乎全日浸浸落，古勝叫看官們小心，內銀股第三季業績炒完，兼且股價返到去八月中對沖基金沽空重倉區，要再升必需要天大利好消息配合，招行（03968）業績對辦，股價尋日仲要最低跌到15.52元，跌幅達8.3%，隊到同二三線股一樣。埋單計數，恒指尋日跌154點收報19,864點，成交額由上周五1,094億元，縮三成七得番683億元，小心基金被迫入市補貨活動或暫時告一段落！大市沽空佔總成交比例維持8%樓上，沽空金額最勁五隻依次係農行（01288）、招行、中移（00941）、滙控（00005）及平保（02318）。

拯救細節仲有排傾

歐峰會通過拯救歐債危機方案，其實框架同市場期望大同小異，股市反應咁激烈，古勝認為八、九月，幾個歐洲大國元首好似細路仔玩泥沙，唔單止拯救方案一時一樣，更擺出一副「口爽荷包立」的不合作態度有關，降低市場期望。直到近兩星期拯救方案露出曙光，風險胃納先返晒嚟。

插過、挾過，發完一場噩夢，港股今日重返到八月中旬水平，今年仲有四十幾個交易日，就要同二○一一年講拜拜，最多人想知想問，一定係買定唔買？追定唔追？歐盟峰會救援方案拍板，不過細節如何落實，歐洲佬邊度搵錢出來填希臘啲賴債，銀行「自願性」剃頭後資本黑洞？仲要等未來幾日法國康城新一輪峰會再坐低傾。

萬七樓下酌量買貨

祖國方面，溫爺爺話「適時適度進行預調微調」，轉個頭話，叫大家唔好期待壓抑內地屋仔價格措施會短期內取消，上星期市場仲憧憬較具規模放寬銀根，刺激經濟的幻想，立即破滅，內房股跌到一仆一碌，龍頭股中國海外（00688）跌5.6%、碧桂園（02007）跌5.4%、恒大（03333）跌5.2%，部分建材、水泥股意外地逆市做好，但古勝估計係補倉帶動的死貓彈居多。

挾空倉過後的港股，一旦焦點回到經濟層面，加上臨近年尾，基金陸續收爐，恐怕有一段日子，股民要捱住唔升唔跌的悶局，古勝認為，17,000點冇買、18,000點冇買，19,000點都冇買，實在無理由在20,000點先至嚟入市咁笨。正如一個月前無人估到大市可以十八日挾高4,000點一樣，現金就是王，入市毋須急於一時，古勝相信，股友可以等未來半年跌至17,000點樓下，酌量買嘢博反彈，逼近20,975點阻力，沽貨放假去矣。

今日焦點係祖國十月份的採購經理指數（PMI）身上，大孖沙估數字繼續高於50的擴張線，由九月51.2，升至51.8。目前矛盾之處，乃中國堂堂製造業大國，PMI差會令賭經濟硬着陸淡友，更肆無忌憚，反之假如數據太好，憧憬阿爺今年第四季到明年首季，宏調可以高抬貴手的憧憬幻滅，難怪十月環球股市大反彈，計反彈幅度，滬綜指排在倒轉數頭幾位，僅僅由不容有失的2,307點，反彈到尋日2,468點的6.9%。

古勝