早排爆發嘅民企風暴，係擔心民企出咗事都唔知點追，依家有隻「人辦」浙江玻璃（00739），大家仲記唔記得？呢隻股早在舊年五月停牌至今，只出過兩次延遲公布業績通告，一直唔使交代事件，做佢小股東真係蒙在鼓裏，就咁坐咗響度一年半！
絲絲係睇到大陸報紙《21世紀經濟報道》，先至知浙玻老細馮光成，涉「非法吸收公眾存款罪」，同其他5名相關高層，響紹興縣人民法院上緊庭。
報道話，馮主席依家被「監視居住」，庭上面容憔悴，因左耳聽力障礙而自辯時多次「自說自話」。案情指早年宏觀調控打擊水泥業，馮氏要出售水泥業務，銀行又突然對浙玻收貸，佢就發動民間借貸「非法吸存」，單案仲有排審。
○一年十二月，浙玻係第一間喺港交所（00388）上市嘅民企，投資者絕大部分喺境外，依家咁大件事，公司無披露，港交所又跟唔到，又無乜媒體報道過，依家竟然由絲絲做咗中國境外第一報料人，都咪話唔諷刺。浙江玻璃管理層睇到絲絲轉述最新情況，會唔會考慮主動出番個公司通告，等小股東都知道為乜事而坐咗年幾呀！
馮主席響庭上講：「政府話借高利貸是飲鴆止渴，咁銀行不肯放貸，又要維持公司正常運營，我仲有第三條路可以走咩？」以上正好反映晒現今國情風險。