市場熱線：上石買貨唔使急

截至上周三，基金經理可以話「突然樂觀」，風險胃納大增，新興市場高息債券錄得32億美元淨流入，唔單止係十二個星期以來首次，金額計仲係○三年以來最多，可惜股票基金客戶睇住八、九月報表，唔少已按捺不住，唔等十月底贖回死線，Long only（長倉基金）截至上周三錄得15億美元淨流出，是連續第七個星期，換句話說，即使歐盟峰會真係有奇迹出現，好多基金投資者都可能享受唔到好處。

現階段宜見步行步

歐盟峰會連加時都玩埋，今晚點都要有啲實質嘢公布，其實孖屐已一路收風，最重要消息係德國議會已尋求通過EFSF擴大到1萬億歐元嘅方案，1萬億歐元可謂唔湯唔水，淨係意大利國債都萬九億歐元啦。上次歐洲七月峰會推咗個4,400億歐元EFSF之後，魚缸冇幾耐就大冧檔，因為好快就發覺唔夠使，今次有1萬億歐元應該唔會咁快乾塘，而且歐洲傾完之後到G20開會，跟住又會輪到美國傾QE3。睇尋日孖屐反應好似已經收貨，不過作為散戶，只能揣測大戶點做嘢，惟有見步行步做定兩手準備。

歐豬債券有擔保總好過冇擔保，借錢息率亦可以回落，所以唔能夠抹殺今次歐盟峰會努力。不過，好多人仍覺得EFSF只係暫時止咳，睇見希臘國債要撇帳五、六成，擔保得一、兩成作用有限。另外，歐洲只係表面團結，英法兩個世仇開會期間嗌交，英國仲想話搞公投要退出歐盟，真係講錢傷感情……

比亞迪電子（00285）同創科（00669）兩隻工業股翻生，創科有花旗唱好，而比亞迪電子拍住諾基亞一直冇運行，唔似得瑞聲（02018）泊着蘋果公司呢個好碼頭，現價同52周高位相差不到兩成。諾基亞就快推出新手機，睇吓可唔可以搶番部分江山。同日本合資嘅汽車廠真係流年不利，日本地震之後又有泰國水災，喺擔心零部件供應之下，東風（00489）同廣汽（02238）均逆市下跌。

I.T（00999）同利信達（00738）業績都見光死，前者放榜前已升定先又減派息，被插係意料中事。業績股最強嘅係中煤（01898），中鋁（02600）喺開波前拉閘，公司今日就派第3季成績表，但竟然喺之前嘅分析員會議預警，個timing真係不敢恭維。

業績股亦可以留意吓上海石化（00338），佳期定喺聽日。阿爺喺兩個禮拜前調低咗成品油價，但跟住內地油站即時鬧油荒，中石油（00857）呻窮話煉油要蝕成500億，無非係想阿爺有補貼或者畀成品油價更貼近市價。油荒可大可小，而且內地通脹已有回落迹象，古勝認為改革成品油定價機制絕對有機會舊事重提。

或重提成品油改革

上石上半年賺少5.8%，國泰君安估計成品油價調低後，上石同阿媽中石化（00386）旗下煉油廠可抵受每桶108美金嘅原油成本，毛利可以維持高位，第三季盈利有機會好過預期。上石係煉油同化工一體化嘅公司，煉油蝕咗，化工亦可以賺番，而一旦成品油定價機制改革對佢絕對會係好事。

隻股尋日勁升8.5%，如果升穿3蚊就可以突破長達大半年嘅下降軌，而聽日嘅業績就係一個契機，各位可以留意吓成績表有冇驚喜。

古勝