港交所（00388）交易大堂剛剛續咗約就搞搞新意思，由依家開始，上市公司每逢上市周年紀念，又或者係公司嘅重要里程碑，好似創立日等等，只要「科水」三萬八千元，上市公司老闆同埋其邀請嘅嘉賓，就可以主持港交所開市儀式，港交所仲新設「敲鑼」環節，到時真係夠晒熱鬧！整個儀式嘅錄像同相片仲會上載到港交所網站。
交易大堂依家正進行規劃準備裝修，待二○一三年交易大堂翻新後，開市儀式更會升級呢。但點樣加料，就要拭目以待。其實交易大堂長遠可能會搬去政府總部西翼，由於係全新興建，到時「新花款」可能會仲多添！
除咗開市儀式外，港交所依家仲計劃每月喺交易所會議廳舉辦研討會，邀請相關行業、板塊或主題嘅上市公司代表出席，講解公司嘅最新資訊。當然不包括股價敏感資料喇！呢個世界當然冇免費午餐，每間上市公司盛惠二萬八千元。
不過，研討會有一定賣點，因為初步構思係會集合同一板塊嘅公司，好似係5至10間，港交所安排邀請分析員、經紀、機構投資者、同其他市場專業人士等嚟聽，對公司嚟講算幾方便！
余絲韻