市場熱線：康師傅貴得有道理

萬九點喺圖表上係好大阻力，但唔係話升穿咗就掂，要企得穩先算係突破。距離禮拜三揭盅得兩日，始終要等埋歐盟有乜救市方案至可以蓋棺論定，依家孖屐有晒共識，一定出到個方案，而EFSF一定會槓桿化。如果傾唔掂則可算係「黑天鵝」事件，傾得掂亦有可能趁好消息出貨，總之大家執生。

大市升成交淡靜

恒指尋日升746點，收報18,771點，期指仲高水80點，大升市得613億元成交仍算淡靜。尋日上升股數超過千隻，50大升幅都多過一成，藍籌股全部上升，頭兩位係內房股潤地（01109）同中海（00688），內房股呢排都係壞消息為主，最大影響係銀行加按息，而地方政府獲准自己發債亦會減少靠賣地倚賴。而地方發債則肯定對內銀股係好消息，呢幾日升到甩轆，招行（03968）尋日再升一成。

講到升勢，自然係「小甜甜」系幾隻股最威，「風水陳」連上訴都被否決埋，甜甜系正式納入華懋慈善基金旗下，引發咗好多幻想，例如華懋會注入資產，或者將股權賣出去。龔如心只係揸咗香港資源（02882）幾個巴仙，最大股係安寧（00128），但尋日急升後已高過公司帳面值0.61元。

假如歐債危機今次過到骨，孖屐焦點會重新放喺經濟數據方面，今個禮拜美國會公布第三季GDP，滙豐中國十月PMI回升到51.1，而「奧爸媽」尋晚會公布推出按揭再融資方案，又憧憬QE3，所以尋日係好事一齊來，A股亦終於回升逾2%。

尋日古勝認識了一位到華投資設廠嘅德國商人，閒聊幾句，問佢點睇今次危機，佢話近兩年德國經濟，確實比歐元區其他成員好，貴為區內領袖拯救危機是責無旁貸，但最怕德國政府聯袂IMF救希臘後，開咗先例，其他「歐豬」出事就變成不能不救，德國政府未來可能要透過加稅提高財政收入，勢必影響營商，近兩季德國本身經濟及工業生產有放緩迹象，只怕政府太落力，最後被拖埋落水。

真明麗（01868）同敏華（01999）同發盈警，證明出口股真係咁差？而安莉芳（01388）、博士蛙（01698）、寶姿（00589）同YGM貿易（00375）則先後公布銷售增長3成以上，內需股同出口股真係冇得比，買股除咗睇行業之外，最重要係睇市場。

康師傅（00322）就係一個市場奇迹，喺台灣同香港都銷量麻麻，但偏偏喺中國就紅到發紫，市佔率年年增加，祖國同胞愈來愈有錢，佢哋就推出高檔即食麵。

飲品市場增長勁

話晒即食麵市場已增長有限，所以近年佢哋已以飲品市場作為增長動力，上月初管理層預期未來3至5年飲品業務收入同盈利嘅複合增長率可分別達到30%同15%，盈利增長慢過收入主要係驚毛利率降低，但近月內地通脹開始受控，食品同飲品可以加價去彌補成本升幅，而塑膠包裝、糖同棕櫚油等原材料價格亦回落，所以毛利率有機會回升至啱。

由於係必需品，食品股一向可以跑贏通脹，所以康師傅走勢相當硬淨，前排被瘋狂空襲亦冇有怕。講PE高，康師傅在芸芸港股中可算數一數二，但佢嘅增長概念長賣長有，以一間千幾億市值嘅公司唔使跟大「隊」，可算貴得有道理。

古勝