絲絲講場：渣打旗艦店五感混合理財
渣打香港中環旗艦分行尋日正式開幕，希望打造「七星級酒店」服務，將觸覺、視覺、聽覺、味覺、嗅覺五種官感，混合理財業務之中。
大家可能會問，點先可以做到呢？咪就係透過成萬銀一張嘅Designer chair、名畫、主題音樂、Godiva朱古力、同埋渣打香港獨有香薰囉！
講番間旗艦分行，佔地逾1.58萬方呎，有四層樓高，係渣打香港目前最大、員工人數最多嘅分行，有齊一般個人銀行服務、優先理財服務、以至國際銀行服務，計埋39名客戶經理，足足有成70人。
過億元翻新60分行
渣打香港個人銀行業務主管禤惠儀（Mary）話，年初講過投資逾1億元優化分行網絡，依家都翻新咗超過60間分行，換言之，四分之三嘅分行已有新形象見人，計劃至少有四至五間旗艦店，希望明年第一季之前「面世」。
絲絲尋日參觀過中環旗艦店，又確係幾靚，而最驚喜嘅，就係發現銀行分行好罕見嘅客用洗手間，非常貼心。
上個禮拜，絲絲聽到，有個地產經紀講，話渣打唔租嘅新世界大廈地下一地舖，由英皇以三百萬月租頂咗個位。嗰時絲絲都唔明點解個位置咁好，點解要放棄呀。依家就明喇，原來係開過一間更大、業務咁全面嘅分行。
余絲韻