絲絲講場：霍建寧預告7年好時光
意大利經濟前景唔多明朗，市場見和黃（00013）旗下嘅3意大利喺最近嘅4G頻譜拍賣中，無拎到800兆赫頻譜，仲以為公司會放棄呢個市場添。不過和黃董事總經理霍建寧，就用聖經創世紀入面約瑟發夢嘅故事話畀大家知，公司嘅3意大利業務啱啱先開始嗰七年嘅好時光。
唔競投4G頻譜仲着數
霍生用嘅比喻相信好多人都唔會陌生，個聖經故事係講約瑟發夢夢見法老王嘅七條肥牛同七條瘦牛，呢幾條牛就正正代表咗尼羅河七年嘅繁盛同埋之後七年嘅饑荒預兆。佢話3意大利嘅業務前景就啱啱相反，集團由開始至今就一直針對高數據流量嘅顧客群，推出進取嘅數據傳輸費用，比競爭對手更加早着先機。
霍生唔單止用聖經故事嚟交代公司喺當地嘅業務前景，仲計埋條數畀大家睇，點解唔參與競投。佢話競爭對手喺競投嗰個800兆赫頻譜各須支付超過11億歐元，但公司只喺支付3.05億歐元就投到1800兆赫同2600兆赫中嘅兩組頻譜，就算加埋興建發射站個2.5億至3億歐元建築成本，集團最終唔單止慳咗8億歐元，而且仲可以立即使用現成嘅頻譜擴展服務添。原來集團已經密密為意大利3G之後嘅業務發展落咗咁多苦功！