新世界發展（00017）尋晚出咗年報，集團靈魂鄭裕彤（彤叔）嘅主席報告，就劈頭吟咗蘇東坡首《前赤壁賦》「客亦知夫水與月乎？……則物與我皆無盡也，而又何羨乎？」解釋話世事無常，變幻才是永恒不變的現實，比喻集團要響不斷變化嘅大環境採取適切謀略。
年報又披露咗新世界高層嘅人工，整體不加反減，一一年五大最高薪高層共收2,930萬元，比一○年減咗16%；最高薪嗰位由一○年嘅最多1,900萬，減到最多1,250萬蚊。
但一眾董事就大致有得加：彤叔依然只收30萬董事袍金，最高薪嘅純官鄭家純，薪津加咗160萬元去到2,510萬元，連其他項目共收3,140萬元一年；今年一月起退任行政職務嘅元老堅叔梁志堅，年薪仲有440萬元（一○年收730萬元）；大紅人鄭志剛都大幅加薪170萬元，去到1,060萬元。