市場熱線：陰霾未消提高警覺

太保（02601）成績表唔合格，原因係第三季投資慘蝕，「高佬盛」第三季業績見紅亦係因為手上工行（01398）股票大跌，我哋嘅MPF供款都肯定水瓜打狗唔見一截。國壽（02628）同平保（02318）尋日亦被拖累，但本地地主股接力上升，新世界（00017）向股東伸手準備低價買地，有人視為發展商睇好後市。

汽車股個別發展

今年暫時集資額最高嘅A股中國水電，第二日就一度跌停板，滬綜指走勢奇差，祖國九月FDI得單位數字升幅，六中全會推動文化產業成國民經濟支柱，祖國搞基建、鐵路、保障房、水利、環保，樣樣都係高興一輪又打回原形，文化產業股得新華文軒（00811），但好多人已唔記呢隻股票，因為佢走勢實在太悶。

發盈喜嘅長汽（02333）先升後跌，宣稱寶馬加價嘅華晨（01114）亦都要跌，但其餘車股普遍做好，比亞迪（01211）因有3款車列入節能車補貼名單而升5.5%，新目錄得49款車可以攞3,000蚊人仔補貼，但受影響最大嘅吉汽（00175）仍有得升。

I.T（00999）下個禮拜一派成績表前炒高近一成，尋日放榜嘅中國建築（03311）同經緯紡機（00350）亦有人炒，但前者先升後跌，炒業績不嬲係高難度動作，因為無論成績表高分定低分都要鬥走得快。

前日大跌嘅太陽能股普遍回升，其中卡姆丹克（00712）升逾9%，但保利協鑫（03800）仍冇厘神氣，話說多晶硅價格喺呢兩個禮拜狂跌35%，連保利協鑫呢類龍頭都可能冇錢賺。

未來有分拆機會

內地傳媒成日唱衰綠城（03900）孭債高屬高危一族，而綠城贊助嘅中超球隊杭州綠城，早前一場波發生「球員當教練、教練當觀眾」事件，立即引發綠城資金乾塘要節衣縮食猜想。

中國燃氣（00384）亦有股東爭拗呢類負面新聞，但唔負面就唔會搞到股價咁落後。除咗中燃之外，其他燃氣股都明顯跑贏大市，因為有半隻公用股特性，而內地法例規定每個地方只可以有一個燃氣供應商，所以愈插得旗多愈有着數。中燃喺內地有百幾個項目，計平均數每個項目賺得好濕碎，但個網絡其實好值錢。

中燃當然冇可能將個網絡拆骨出售，但其餘業務有條件分拆上市，管理層前排接受外電訪問時話，液化天然氣（LNG）同液化石油氣（LPG）業務未來都可以分拆，但先要養大兩個仔，所以最快都要等到二○一五年。

其實燃氣股仲有個概念，其一係因通脹延遲咗年幾嘅民用燃氣加價，依家通脹回落將有轉機；另外就係傾咗好耐嘅俄羅斯天然氣供應協議，上個禮拜中俄傾掂咗管道石油價格，天然氣一旦傾埋，燃氣股可開香檳，但多數燃氣股已唔平，大落後嘅中燃值博率較大。

古勝