絲絲講場：滙豐增義工假鼓勵行善
滙豐銀行早前話要裁減三千個職位，詳情最快都要下個月至知，員工心情可想而知。不過，有關滙豐嘅消息，又唔係件件都唔啱聽嘅，近日佢哋有好消息公布，員工做義工嘅有薪假期會增至兩日，等員工可以行善之時，更加開心。
大家耳熟能詳嘅公司有薪假期包括年假、婚假、產假及病假等，「義工假」就唔係間間都有。絲絲喺滙豐做嘅好姊妹就報喜訊，話公司為咗鼓勵員工參與義工活動，更改咗啲細節，員工一年可申請兩日有薪義工假期服務社區，服務對象以公司認可嘅社區志願團體為主，其他團體都得，但需同公司傾一傾。好姊妹仲話，除咗義工假、生日假，其實滙豐仲有好多特別假期畀員工，好似公職假及考試假咁，加埋最多已經有10日，聽落福利唔錯。
林安妮加入環球資產管理
另外，尋日滙豐環球資產管理委任咗林安妮（Elizabeth）做董事兼亞太區信貸分析主管，佢已經有十五年行業經驗，喺加入滙豐之前，曾經做過穆迪投資服務副總裁及高級信用評級主任。近排滙豐好多人事變動，走嘅都係膊頭有花之人，搞到高層出現「淨流出」，林安妮係靚女一名，呢個委任令公司加添唔少生氣。