聯想集團喺電腦業已經站穩住腳，未來係做好農業，仲係聯想控股爭取喺二○一四年至二○一六年整體上市嘅其中一項主要業務，近日仲做咗一啲人事調動，配合「現代農業」嘅發展。
聯想集團高級副總裁、新興市場總裁陳紹鵬將離開聯想集團，加入聯想控股，領導旗下一項新業務「現代農業」。呢項業務係新，但聯想控股董事長柳傳志喺半年前已經提早公告，有意發展現代農業，想打造一個知名嘅食品品牌，仲喺舊年成立農業投資事業部，今年先後入股湖南武陵酒有限公司、河北承德乾隆醉酒業兩家白酒企業。
既然現代農業係柳傳志心目中嘅「非常重點」行業，就需要有深厚管理根基嘅領軍人物，於是就調咗陳紹鵬過來。柳傳志講過，做農業要長期冇錢賺、長期投資，對陳紹鵬嚟講，壓力會唔會輕啲呢？
陳紹鵬九三年加入聯想集團，本來想從事技術工作，但最終被安排喺銷售崗位，喺擔任中南區總經理期間，銷售業績曾錄得超過五倍增長嘅成績，被譽為「銷售奇才」。○五年，聯想收購IBM個人電腦業務後，陳紹鵬就係負責推動完成聯想Lenovo和IBM Think融合工作。