有「末日博士」之稱嘅經濟學家魯比尼（Nouriel Roubini），近日繼續其末日論，無論歐債危機嘅發展係點，已發展國家嘅經濟，已無可避免會出現雙底衰退，而且佢又相信中國經濟會出現硬着陸。之不過，佢嘅眼光就算係準到加零一，都保唔住自己創立嘅經濟研究顧問公司Roubini Global Economics（RGE）。
美國嘅CNBC尋日引述消息話，魯比尼正透過投資銀行將RGE放售。魯比尼因為準確預測次按危機而打響名堂，RGE亦因此急速發展。據講目前嘅員工就達85人。由於間公司依家仲搵緊買家，有投資者話睇過盤數，RGE今年雖然實現1,400萬美元（約1.092億港元）嘅營業額，但全年虧損將估計達200萬美元（約1,560萬港元），即係話RGE目前仍然處於虧損狀態。對於RGE放售消息，RGE同埋魯比尼本人暫時仍未作出任何回應。
大家可能奇怪，魯比尼既然咁準確預測，歐美及環球經濟轉差，點解佢間RGE都唔能夠睇準機會賺大錢呢？有分析就相信，係因為作為學者嘅魯比尼太過正氣，堅持唔畀RGE參與沽空，又或者揸埋鑊鏟炒埋一份。如果「空」埋一份，公司唔單止唔使蝕錢，分分鐘可能喺逆市中大賺一筆添！