市場熱線：中信証券夠鐘開車

恒指重上20日線，期指高水116點，港股收市後美股期指同歐股轉跌為升，恒指話唔定可邁向萬九。恒指自從三、四月嗰次之後，今次係首次反彈可以超過2,000點，恒指若升穿萬九就好有轉勢feel，升唔穿就完成反彈，或係最後逃生機會。

魚缸暫無視壞消息

尋日有幾單壞消息，包括斯洛伐克否決擴大EFSF、「美女」業績變醜婦、美國參議院通過人仔法案、奧巴馬嘅刺激就業方案亦遇到阻滯、佛山叫停限購令反而被人叫停，前兩樣更係美股收市後至發生。而好消息就只有希臘下月筆貸款過到骨，所以恒指早段跌超過300點都有道理，但多得A股止跌回升，昨日雖然有政府公布施政報告，但內容並冇「驚嚇」，個市更加止跌回升。

壞消息唔跌嘅股大把，「美女」業績走樣，但中鋁（02600）倒升8.5%成為最大升幅藍籌，放寬限購令落空但內房股照升，當然唔少得本地地主股，當年有「八萬五」，未來年年有四萬，又新居屋又置安心又填海又轉工業地，但孖屐覺得你冇料到就係冇料到，反而供應增多咗，美聯（01200）、美聯工商舖（00459）同田生（00183）等乘機有炒作。

A股尋日大逆轉，朝早先創兩年半新低，跟住180度轉彎，幾個指數都升超過3%，若話係匯金入市刺激，今次反應可算慢得出奇。暫時唔知匯金有冇再出手，不過期指空軍有所顧忌，自然沽得冇咁狼死，老實講A股再大跌嘅空間已經唔大，不如轉沽為買一樣可以搵錢，起碼唔使同國策對着幹。

祖國狂炒券商股，包括海通在內有4隻漲停板，有人話炒起原因係年內推ETF，但古勝認為不如博年內有更多救市措施仲實際，上次○八年九月匯金入市時，阿爺同時單邊收印花稅；今次匯金再入市，前日A股反應認真麻麻，阿爺不排除會加碼，就算唔減印花稅，亦可能減紅利稅。

貨源歸邊短炒無妨

香港嘅券商股亦乘機炒起，有6隻升超過1成，但真係喺祖國有證券業務嘅公司得大光燈（00165）同中信証券（06030）兩隻，後者可算上市上得及時，雖然散戶冇人吼，但加速貨源歸邊。

中信証券上市頭4日一路潛水，尋日卒之大爆發，升8.2%收報14.22元，高招股價7%，A股尋日亦升6%，A股仍貴過H股少少，PE約10倍多啲，好難講抵唔抵，不過A股市場低迷兼成交疏落，依家全民做大耳窿，股市係最低潮時期；A股有周期性，稍後資金可能會重投股市，到時證券商生意亦會好轉。如果A股真係續有救市措施跟尾嘅話，中信証券憑貨源歸邊可以短炒，大落後嘅A股亦係時候報復性反彈。

古勝