作為一個新進媒體朋友，講股又唔夠班財星老友記叻，惟有搵另類空間發展，有時咁樣仲過癮，係唔係！大價股有大價股分析，二三線股，要歸納佢哋嘅財技法則都唔係咁容易，Prof J好彩有戰友國建兄，互相衝擊，最終歸納變成了以下一個心法同各大讀者分享，叫做「拆配合供」。拆，即係拆細股份，配供者，仲使講梗係市場上配股集資抽水啦，合，即係合股，通常大家一般聽到都係五合一、十合一等，供者，供股也。大部分投資者都唔會陌生，皆因「人人有份供」，唔供股，權益自然被攤薄。神招一出，投資者即O嘴，無計。
不過，大家可以放心，唔係間間上市公司都會做齊以上四招。早排有間公司真係將以上四式完美無瑕咁演繹一次。例如將股份二十合一，又增加股本，配完股又供股，早排又再將股份一股拆五股，如果係游水比賽中實攞滿分。好多投資者買股票，以為跌到一仙，應該可以跌夠，誰不知，一合再跌，真係喊都無謂。
其實Prof J呢個「拆配合供」嘅奧義，係畀大家一個架構來分析，講真，大戶好多時候都提咗你，不過因為你一時慌張忙亂唔記得咗。記住，大戶朋友都唔係想你「瓜柴」，最緊要係有不敗再戰嘅精神，咁樣市場先好玩，淨係玩自chok又有鬼用咩，係咪。
香港大學電子金融服務榮譽助理教授 徐燦傑