話說英國大行巴克萊（Barclays）第四季推出節流措施，由員工出差坐飛機、夜班交通以至食消夜都有新限制。例如當地員工出差，如果航程少過四小時，就唔可以再搭商務客位！據講話此舉係倣效其他同行的做法。
過九點至畀消夜錢
投行員工加班開夜可謂家常便飯，以往好景時公司在呢方面都好照顧員工，依家又如何？巴克萊就要求員工如果因為夜班工作要搭的士嘅話，車程一定要少過5哩，車錢先至得到公司補償。至於員工要叫外賣食消夜嘅話，送外賣時間就要押後一個鐘頭，即係九點鐘之後先有得食消夜，否則公司又係唔補償飯錢。
雖然話新措施令員工無咁方便，但依家咁嘅時勢，投行員工將就一下啦，總好過公司因開支太大要裁員！
余絲韻