絲絲講場：瑞年王福才：咩係「沽空」？
大行評級報告殺傷力驚人，有啲機構心懷不軌，趁有睇淡報告出籠就藉沽空行賺錢。瑞年（02010）上周五就被大摩突襲，無獨有偶市場人士留意到大摩報告前夕，瑞年沽空金額有所上升，公司主席王福才作為受害人，佢話唔知咩叫沽空。吓，咁咪隨時被人劏咗都唔知死因！
王福才一面無奈咁話，自己係研製保健產品技術出身，對市場風雨不太明白，甚至連「沽空」都不太懂。
做好業務應對
面對今次事件，公司以正常手段去應對，就係做好業務。首席財務官潘翼鵬又接棒表示，公司未有計劃向證監會投訴，相信監管機構應會自動去調查喎。好彩瑞年反應夠快，仲識得出嚟反駁大摩份報告。絲絲記得穆迪喺早幾個月，出咗份「紅旗」報告，羅列一堆民企股，目的係「示警」，搞到啲民企手尾好長，當時並唔係間間被插旗嘅民企都「站出來」。
其實家陣市場都傾緊禁唔禁沽空嘅問題，仲要幾hit吓，雖然以王主席今時今日嘅身份，自有其他專業人才幫佢分憂，但係絲絲擔心，王主席如果唔跟住update行情，可能同分析員或投資者無咩共同話題，最慘係被人做淡搶錢都唔知發生咩事，咁就唔好啦。
余絲韻